人生三分一時間都係瞓緊覺，要瞓得好先至有精神。但係你又有冇試過瞓醒之後，成個人頸梗梗，仲要攰過未瞓之前？咁就可能係你張床同個枕頭出咗問題。寢具每晚陪住我哋差唔多8個鐘，所以揀得啱好重要。今日小編就請到何文燊脊醫同我哋講解點樣揀枕頭同床褥。
揀枕頭床褥有咩竅門？
何脊醫話揀寢具最緊要係保持頸部同脊椎嘅自然弧度，等頸部同頭部保持水平。如果長期用唔啱嘅寢具，隨時會影響脊椎健康，引發痛症。揀寢具主要睇兩樣嘢：軟硬度同物料。軟硬度方面，除咗睇你嘅喜好之外，最重要係有足夠承托力，等到頸背唔會懸空，以免肌肉成晚都要發力。
而家市面上有幾種常見嘅選擇：
-
羽絨：較軟、結構鬆散，承托力略遜色
- 椰棕：實惠耐用，但偏硬、與身體嘅貼合度較差
- 彈簧：透氣、承托力好，但抗干擾及舒壓能力失色
- 太空棉：相對更佳嘅選擇，因太空棉具感溫嘅性能，能隨人體溫度而轉變形狀，從而緊貼頸部和背部嘅輪廓，包覆性強，提供個人化承托力。太空棉又稱慢回彈棉，受壓時能吸收和卸走壓力，並慢慢恢復原狀，幫助頸部和背部放鬆。
最後何脊醫建議買寢具嘅時候，最好將床褥同枕頭一齊試用，感受完整嘅睡眠體驗再作決定。
揀床褥3大Tips
1. 睇體重
先用BMI嚟決定床褥軟硬程度。如果BMI細過18.5嘅人就要揀軟啲嘅床褥，相反BMI大過23嘅就要揀硬啲。
2. 留意睡姿
合適嘅床褥會令到你條頸同胸骨成一條直線。而大腳同腳嘅角到會微微屈曲，承托住膝頭。咁先可以令大腿後嘅膕繩肌、小腿位置嘅肌肉放鬆，形成舒緩嘅作用。
3. 承托力
呢個係揀床褥最重要嘅指標，可以試下將手指放喺腰下，如果感受到床褥嘅反彈，但係又唔可以將成隻手放入去，咁就啱啦！如果鍾意瞓硬啲嘅，亦可以揀彈簧加太空棉嘅混合型床褥。
揀枕頭3大Tips
1. 了解自己需要
如果頸椎有問題，譬如椎間盤突出、頸骨過直或者退化，一定要先睇醫生。另外，都要知道自己睡眠習慣：
- 鍾意仰瞓就揀矮啲嘅枕頭
- 習慣側瞓就揀高啲嘅
- 成日轉身嘅就要揀弧形枕頭
2. 搵人幫手睇下瞓姿啱唔啱
買枕頭嘅時候帶埋朋友或者屋企人去，等佢哋幫你影低瞓覺嘅樣。仰睡就要睇額頭同下巴係咪平行，最多就係額頭高過下巴5度。如果側睡，全身由額頭到心口都要成一直線。
3. 試枕頭要配合自己張床
買枕頭要喺同你屋企張床差唔多物料同硬度嘅床褥度試。如果喺硬床度試，但係你屋企張床係軟嘅，咁揀到嘅枕頭就唔一定啱用。所以要事先知道自己張床係軟定硬、係咩物料造，先至唔會買錯。
最後提提大家，瞓得好先至精神好。揀床褥同枕頭唔係慳得就慳，自己嘅健康非常值得投資。如果瞓得唔好，會影響學習同工作，長期更加可能會影響脊骨健康。所以，記住花少少時間同心機去揀一張啱嘅床褥同枕頭喇！
