儀式感唔單止拍拖先需要有，對於想瞓個好覺嘅你都一樣重要！香港生活節奏急促，建立屬於自己嘅睡前儀式，不但令你生活更有質感，更係擁有高質深度睡眠嘅關鍵。
今次，小編會同大家分享一啲簡單有效嘅睡前儀式同小貼士，幫你每晚有覺好瞓。一. 沖涼時間影響睡眠質素
我哋日日都沖涼，但想瞓得好嘅你又有無揀啱時間沖涼呢？
有研究指出，臨瞓前90分鐘係沖熱水涼嘅最理想時間點，因為喺沐浴完擦乾身體後，你嘅體溫會逐漸下降，而呢個體溫變化係大腦接收睡眠信號嘅關鍵。
體溫下降時，你嘅身體會開始放鬆，進一步幫助生理時鐘調節，令你更加容易進入睡眠狀態。如果你經常失眠或者睡眠質素麻麻，不妨試吓將沖涼時間調整到睡前90分鐘，享受呢個自然嘅助眠過程。
小貼士： 將沖涼時間配合入睡時間，形成固定嘅睡前習慣，可以有效改善你嘅生理節奏。
二. 睡前飲食：藥膳同舒眠食物嘅妙用
喺傳統中醫藥學入面，有唔少藥膳同食物係有舒緩失眠同精神穩定嘅功效，今次小編特別為大家介紹三款精選舒眠食材，簡單易買，而且效果顯著。
-
紅棗：補氣血、助入眠
紅棗係藥膳常見嘅材料之一，有補脾胃、益氣生津、養血安神嘅功效，臨床上有助減輕失眠同舒解身心疲勞。紅棗嘅微甜口感非常溫和，你可以加入蜂蜜或者桂圓煮成茶飲，亦可以喺燉菜或者煲湯時加入一齊燉煮。
小貼士：紅棗食太多容易熱氣生痰，如果你係燥熱體質，就唔太適合你。
-
玫瑰花：放鬆心情、平衡情緒
玫瑰除咗靚同浪漫之外，其實都有寧神安睡嘅作用。每晚臨瞓前，你可以用15克玫瑰花瓣泡茶，再加入適量冰糖或蜂蜜飲用，可以有效幫你放鬆身心，促進睡眠。
小貼士：玫瑰花活血散淤效用比較強，建議月經量過多嘅女士喺經期避免飲用。
-
洋甘菊：天然精神鎮靜劑
洋甘菊係大家熟悉嘅助眠植物，內含嘅萜類及黃酮類物質，有助穩定情緒同鎮靜神經。針對睡眠障礙問題，洋甘菊茶絕對係睡前不二之選。
小貼士：孕婦、孩童、肝腎功能不佳、有服用血壓藥、安眠或鎮靜藥物嘅人，飲用洋甘菊茶之前需先諮詢醫生。
其他有助睡眠嘅食物仲包括葡萄乾、椰子、牛奶、蛋同蜂蜜等等，你可以根據個人口味將呢啲食物融入日常飲食。另外，臨瞓前亦要避免食用刺激性飲品同食物，例如咖啡、濃茶、辛辣食物等，都可以令身體更容易入睡。
三. 助眠補充品大公開
-
褪黑素：生理時鐘最佳調節劑
褪黑素係人體可以自然分泌嘅一種荷爾蒙，負責調節睡眠週期。如果你經常有時差問題或者睡眠困擾，可以考慮喺睡前30分鐘服用低劑量嘅褪黑素，幫助大腦快速進入睡眠模式。
-
維生素B12：提升精神同減壓
維生素B12有助於支持大腦功能，改善情緒同減壓，喺減輕焦慮同情緒波動方面有顯著效果，從而有助改善睡眠質素。
-
鎂：放鬆肌肉、舒緩神經
鎂係一種能夠放鬆肌肉同舒緩神經嘅礦物質，特別適合肌肉緊張同容易焦慮嘅人。臨瞓前適量補充鎂，可以幫助你徹底放鬆，幫身體進入深層睡眠。
小貼士：購買補充品時，記得選擇信譽良好嘅品牌同查看成分，並依照建議方法服用，避免過量攝取。
四. 配合好寢具，提升整體睡眠質素
睡前儀式最後亦都係最重要嘅步驟，就係幫自己準備一個乾淨舒服嘅睡眠環境，而選擇優質寢具就係提升睡眠質素嘅重要一環。
SINOMAX Hybrid 系列床褥同枕頭結合咗 Ultra-SPRING 彈簧同 Allergen® Tech 抗敏科技，為你提供全方位承托同防敏保障，令你可以安心放鬆休息。
Hybrid 100 AS 床褥
抗敏承托，吸震防擾，深層舒壓，每晚享受無重輕盈睡眠。
Hybrid AT 護頸彈簧枕
卓越透氣，舒適承托，適合需要深度休息嘅上班族。
建立適合自己嘅睡前儀式，並選擇合適嘅飲食、補充品同寢具，絕對可以大大改善你嘅睡眠質素。記得今晚試吓調整時間沖個熱水涼，臨瞓前再飲杯玫瑰花茶，準備好精神爽利迎接新一日啦！
